Seo Chugaibh Ceoltóirí Glór Ár Linne!
Tá riméad orainn na ceoltóirí agus bannaí ceoil a bheidh ag tabhairt faoi Ghlór Ár Linne a roinnt libh. Scéim chothaithe do cheoltóirí agus bannaí óg Gaeilge is ea Glór Ár Linne, a bhfuil sé mar aidhm aici tréimhse ceardlanna agus meantóireachta a chur ar fáil do ghliúin nua ceoltóirí, len iad a fháil faoi réir le tabhairt chun ardáin náisiúnta agus idirnáisiúnta leithéid d’Fhéile na Gealaí agus Electric Picnic le linn samhradh 2025. Tá an scéim seo maoinithe ag Éire Ildánach agus Comhairle Cathrach Bhaile Átha Cliath, agus á stiúradh ag Raidió Rí-Rá le cúnamh Music Generation.
Little Kings
Bíonn siúlach scéalach, agus mar dhuine as Hong Cong atá anois bunaithe i nDoire, tá neart scéalta ag Ryan Harling, stiúrthóir Little Kings. Roinneann sé iad lena ghiotár, a ghlór íseal agus go dátheangach – ó Stendhal go hIMBOLC. Ag 25 bliana d’aois, tá moladh faighte aige ón mBBC agus tá dhá EP seolta aige le cuidiú a chairde ar an veidhlín, an dordvheidil agus go leor eile, chomh maith le deontas ó Help Musicians in 2023. Chomh maith leis sin, cuireadh an t-amhrán ‘Bringlóid Milis’ ar ghearrliosta Hot Press Magazine mar “cheann de na hamhráin Ghaeilge is fearr ó 2024.”
Thosaigh a thuras foghlama leis an teanga nuair a bhí sé ag obair in Aontas na Mac Léinn, Ollscoil Uladh mar leas-uachtarán, agus bhunaigh sé an chéad scéim chónaithe sa tuaisceart i gcomhar leis an gCumann Gaelach. Tá sé anois ag súil go mór leis an Ghaeilge a chur chun cinn tríd a cheol mar rannpháirtí i nGlór Ár Linne le Raidió Rí-Rá.
Jessie Dingle
Is ceoltóir í Jessie Dingle atá ag iarraidh daoine a spreagadh dul i dteagmháil lena bpearsa féin agus an tírdhreach mórthimpeall orthu. Dar léi, is í an Ghaeilge ceann de na bealaí is soiléire chun an t-aidhm seo a bhaint amach toisc go bhfuil foghraíocht na teanga daingnithe sa talamh. Cumann sí amhráin i nGaeilge le daoine a cheangal le chéile agus le dúchas ársa na hÉireann. Cuireann an Ghaeilge í ar a suaimhneas agus í ag scríobh nó ag seinnt amhráin agus tá sí ag iarraidh an mothúchán áirithe seo a roinnt. Le déanaí, thug sí tacaíocht don ghrúpa ceoil IMLÉ mar chuid de Thionscadal Taylor Swift, agus tá banna ceoil nua bunaithe aici chun tacaíocht a thabhairt dá cuid ceoil. Tá pobal beag ar líne á bháiliú aici le físeanna ar Tiktok agus Instagram, ag léiriú a cuid ceoil féin agus amhráin atá aistrithe aici go Ghaeilge.
Instagram: @jessieandtheveil
Tiktok: @jessieandtheveil
Éire agus Chulainn
Is deartháir agus deirfiúr iad Éire Ní Fhaoláin agus Cú Chulainn Ó Faoláin, le grá don amhránaíocht thraidisiúnta, amhránaíocht ar an sean nós, don cheol traidisiúnta agus don fhilíocht. Tá Éire sa chéad bhliain i gColáiste na Tríonóide agus tá staidéar á dhéanamh aici ar an nGaeilge agus ar an gceol. Tá Chulainn san idirbhliain i Meánscoil Gharman.
Seinneann Éire an chruit agus an fhidil agus canann sí. Seinneann Chulainn an phíb uilleann, an fheadóg mhór, an fheadóg stáin, an fhidil, an pianó agus canann sé. Tá an Ghaeilge ag croílár a gcuid ceoil agus is breá leo amhráin nua sa stíl thraidisiúnta agus ar an sean nós a chruthú. Is breá leo armóin a shníomh isteach san amhránaíocht freisin.
Tá lúcháir orthu go bhfuil a gcéad shingil ‘Mo Ghealbhan’ ar fáil anois ar gach ardán.
Naisc: Spotify
Aisling Moran
Is amhránaí/scríbhneoir amhráin agus ceoltóir traidisiúnta í Aisling le croí indie, brionglóideach agus duairc. Tar éis di céim a bhaint amach sa Conservatoire Ceoil TUD in 2021, thosaigh Aisling ag taisteal agus tháinig sí ar a glór mar amhránaí. Tá a cuid ceoil séimh ach uaigneach, scríofa le macántacht agus leochaileacht a ndeachaigh i bhfeidhm ar lucht féachana ar fud an domhain. I measc na gceoltóirí a thug inspioráid di, tá Lizzie McAlpine, Pheobe Bridgers, Maggie Rogers agus Florence and the Machine.
Le linn na bliana 2024, d’fhoilsigh Aisling dhá albaim a scríobh agus thaifead sí í féin; Chaos Made Holy agus Not Enough, Not Anymore. D’éirigh go hiontach leis an dá albam sin agus leanann Aisling ag casadh go rialta timpeall na cathrach.
Earthmover
Banna ceol ón domhan. Bunaithe i mBaile Átha Cliath, seineann siad meascán post-rock agus math-rock. Bíonn tionchar ag bannaí ar nós Radiohead agus Black Country, New Road ar a bhfuaim a bhfuil úr agus eabhlóideach.
Is é ár eisúint is déanaí ná “Talk”:
Naisc: Spotify